身為炙手可熱的男團隊長,一言一行難免會被放大檢視,壓力難解。現實中的Lokman(楊樂文)或許不能時時隨心所欲,幸好,音樂世界卻是永遠無拘無束,使他可以藉著創作去放慢放輕鬆,在律動中盡情放飛,短暫脫離現實。
假如說Lokman的第一首SOLO單曲〈如果電話亭〉是邀請大家跳進幻想世界,盡情想像;那麼這次的〈FLY〉,他則化身領航員,帶領聽眾齊齊逃離煩囂,飄浮於空中,盡情享受。
輕飄飄地〈FLY〉
〈如果電話亭〉與〈FLY〉,當中所建構的世界都同樣有種抽離現實的意味;以為同是因應Lokman喜好而誕生的同系列作品,但他卻說本來並沒有打算延續〈如果電話亭〉的美麗狂想,倒是聽下聽下,填填下詞,才發現兩者越走越近,似是暗中有著某種連結——
「可能因為我覺得現實世界好多煩惱,不如某啲時刻試下脫離煩惱······我想透過作品去帶呢種感覺俾大家,或者其實我喺創作、自己聽返嘅同時,都帶到呢種感覺俾自己。」在聽歌與創作以外,Lokman笑言騷擾家中貓貓亦是逃離煩惱的最佳方法:「因為當下好簡單,你好享受咁抱住佢,感受一下佢嘅溫度,感受一下佢嘅質地,就係好簡單。」
Lokman形容,自己過往的音樂作品,例如〈如果電話亭〉和與Anson Kong合作的〈虎道門〉,都是偏「重」,氣勢滿滿;然而今次打從一開始,便希望由另一個方向出發:「想試一首『輕』啲嘅歌⋯⋯可以喺party聽嘅歌,但又唔係好似打樁嗰種『砰砰砰』嘅感覺,所以就揀咗house呢種曲風。」Lokman補充,今次音樂上的參考來自自己很喜歡的曲目——英國獨立樂團PREP的〈Cheapest Flight〉,想要呈現這種輕飄飄的無重氛圍。
既然今次的出發點是「輕」,Lokman自然聯想起輕到飄在天上,飛來飛去、自由自在的姿態。然而,到了錄音階段,他才發現毫不輕鬆;這種輕柔的音色,原來不是自己擅長的東西:「有一種糾結同矛盾,我不斷喺度練,但有時候越練,就越有挫敗感」
幸得有監製Gareth與團隊的肯定,Lokman才信心回歸,在錄音途中放膽摸索,調整出自己的專屬風格:「錄音嗰陣都一直調整緊,我覺得未必係技巧上嘅調整,而係可能真係要放鬆啲,去feel下件事。」
忘我深情的一次 good time
這次的〈FLY〉,帶有一種恣意飛翔,隨心而活的感覺,問到Lokman覺得「飛」與站在舞台的感覺會否相類似,他思索了一會,徐徐交出「同樣忘我」這個答案:「舞台表演嘅時候,你需要唔好諗太多;但當你飛嘅時候,你係唔需要諗太多。」
談至舞台,自然不能不提Lokman最近於《W.T.F Live 2025》的舞台演出。有人話「最怕rapper唱情歌」,那個跳住fing的晚上,除了有Lokman一向駕輕就熟的跳唱與rap,他亦罕有流露柔情一面,叫台下觀眾大呼驚喜。
當晚的演唱會有一抒情歌串燒部分,首首都是少少mk多多共鳴的回憶之選。一問之下,才發現當中構思原來出自Alton的一句「廚房佬唱情歌」,其後監製細So提議「不如拎啲真嘢出嚟玩」,於是大家便交出各自的情場飲歌。〈念念不忘〉、〈羅生門〉、〈極愛自己〉、〈取消資格〉⋯⋯一首一首,唱出四位大男孩內心的深情一面——
「抒情歌、慢歌、情歌,我覺得都唔係自己強項,所以都落咗啲苦功。同埋呢一part,其實都係我自己最緊張嘅部分。」
〈FLY〉的歌詞多次提及「good time」,那麼Lokman最近的一次good time又是何時?他再次笑著回想起六月尾的《W.T.F Live 2025》:「最近一次最大嘅good time,一定係我哋小組W.T.F演唱會。因為由籌備到成品,我哋台前幕後都花咗好多心機,而最後係一個大家都好喜愛嘅作品。我覺得呢個係好直接嘅good time。一分耕耘,一分收穫。」
練習獨自作戰
出道接近七年,有過眾多身份,去年初再新增「SOLO歌手」一項。以為Lokman會越來越熟習,誰不知在粉絲眼中向來都是全能型的隊長,卻直言「有啲唔慣」——
「可能因為出道以嚟都係一班人,工作嘅時候,由你出門口坐車嗰刻,已經唔係自己一個人。但當你solo工作嗰陣,好多時候都要自己一個去面對、去處理⋯⋯你就要再同自己溝通多啲,再拎多啲自己出嚟,再多啲表達自己。」
當鎂光燈只照亮自己,那個時刻就僅屬於你。說是可以盡情發揮,但同樣也壓力更大,背負更多:「簡單嚟講就係你要做好訪問,你要唱好首歌,全部都係你自己一個人嘅事。」
每次訪問MIRROR成員,都格外好奇他們經歷過這七年的高低起跌,受盡過萬人寵愛與質疑之後,到底改變了什麼,又成就了什麼。本以為Lokman經已回答過這條問題太多遍,可能早有一套準備好的答案,但他反倒依舊用心思索,真誠回答——
「最大嘅轉變係心態同方式。因為其實每一刻變緊,你經歷過唔同嘅事,你嘅睇法會唔同,或者可能打破咗一啲你以前睇嘢嘅角度。有啲事可能呢一刻啱用,下一刻已經未必成立,所以你要去接受『心態轉變』呢件事,心態要好靈活,處事方式要好靈活,同埋唔好俾太大壓力自己。」
/YouTube 足本訪問影片
https://youtu.be/Ys1cy1vl1rM