「就算將來要搬離大埔，我都會搵一個類似質感嘅地方（居住），好多山，好多海，空間感好闊。」
到底有多喜歡一個社區，才會願意不收分文，自薦成為星級代言人？
問劉俊謙怎樣看大埔，他以一貫含蓄緩慢的語調回答，然而內斂情緒中，不難發現他「拋鑊」大埔人的身份。「我直頭想介紹人哋入嚟大埔住……當真係有朋友本身住九龍，搬入嚟住之後覺得舒服，我就會好安慰，好似人哋喜歡我嘅家鄉咁。」
在「劉謙」眼中，大埔就是現實世界裏的「桃花源」，山色蔥蘢，海灣寧謐，一個能夠讓自己喘息放鬆的安心之所。「每次做完嘢就會好想快啲返到嚟，就覺得連聞啖氣都從容啲，真係有種『嗯～我離開咗所謂嘅鬧市，嚟返一個我嘅家』嘅感覺。」「劉謙」這樣形容，有點瘋狂，又有點搞笑，但必定能夠引起大埔人的共鳴。
一切從富善邨開始
大埔名副其實很「大」，位處新界東部，根據區域劃分，南起大埔滘大埔尾坑及中文大學地界綫，北至八仙嶺，西臨大刀屻，東跨吐露港，連同對岸西貢北約十四鄉與黃竹塱山，以及東坪洲、塔門和赤洲三座離島，總面積超過148平方公里，是香港第二大行政區域（第一大為離島區，逾178平方公里）。根據2021年人口普查，大埔人口多達31.7萬，劉俊謙就是其中一位。
「劉謙」說自有意識開始，已跟父母一同住在大埔；遠離「火車站」（即現時港鐵東鐵綫大埔墟站）、偏安一隅的富善邨，就是他的成長地。「我自細喺大埔長大，住咗都卅幾年喇，基本上係冇去過第二個區生活。」參考Google地圖資料和圖片，「劉謙」小時候入讀的大埔循道衛理小學就在富善邨對面（汀角路與棟樑里），可以想像，彼時小小「劉謙」的日常生活足跡，總是離不開這個公屋小區。
然而大埔這樣大，一街之隔，風景迥異，經安埔路或大埔太和路前往大埔中心，兩區相差只有10分鐘步行距離，已稱得上是「出街」。「會㗎（有這種感覺）！因為都係住喺富善邨，當我（跟父母）出大埔中心，就會覺得：嘩！嗰啲（店舖）已經唔係屋邨嘅嘢，會有啲唔同嘅商店。」「劉謙」形容，當前往的目的地距離富善邨愈遠，「生保」程度就會愈強，譬如很多外人視為「真正大埔中心」的大埔舊墟（廣福道與寶鄉街一帶），雖然同樣置身大埔，惟小孩子看在眼裏，已完全是另一個「世界」，「大埔（舊）墟嗰邊係比較遠，（以前）成日凝住嗰邊好多人，好嘈，我個人伙好怕嘈，所以細個嘅時候，相對上冇咁鍾意嗰邊，而家係成個大埔區都好鍾意。」
中學時代的《大埔仔出城記》
留意到最後那句話嗎？乍聽有點行貨，但細讀以下內容，就會明白那是「劉謙」經歷廿多年「出城」生活後的深切體會。小學畢業後，「劉謙」考入賽馬會體藝中學，需要跨區到沙田區（火炭）上課，自此《大埔仔出城記》正式「連載」：每天乘「火車」返學，告別眼熟的宏福苑與王肇枝中學，在公路下橫過，吐露港就在窗外移動；穿越大埔滘隧道和樟樹灘（即現稱為白石角），代表已轉入沙田區範圍，再經香港中文大學、沙田污水處理廠、沙田馬場和何東樓車廠，踏出火炭站，沿天橋前往學校，到放學的鐘聲響起，又會跟同學仔一起到沙田新城市廣場閒逛……無論哪個角度看，都是一片「新天地」。「細個嘅沙田都唔算好多人嘅（新城市廣場於2004年聖誕及新春假期曾錄得單日32萬人次出入紀錄，成為全球人流最高的商場），當時仲未去過九龍，但嗰陣都已經有種感覺：『新城市廣場咁大嘅？大埔中心好細喳喎！』」
少年就是（也必須）充滿好奇心，就在初次踏足沙田後沒多久，「劉謙」跟同學決定「打大佬」── 勇闖儼如「世界中心」的旺角！「當時我讀中一，好記得行行下嗰條行人專用區（西洋菜南街），見到點解隻腳會攝住咗？原來後面有架車（向前駛）攝住隻腳，好在冇事，但好深刻嘅就係，好似出到旺角就要打醒十二分精神。」大埔街道寬闊，人口密度較低，相比之下，旺角人車爭路每分每秒「上演」，加上遭汽車「攝腳」嚇一嚇，初探鬧市的小伙子頓時緊張起來。「旺角成個區域嘅面貌好陌生，街道設計亦都同大埔有好大落差，好多井字型，不斷交錯，唔同街就負責賣唔同嘅嘢，成個Vibe（氛圍）可能對於某啲人嚟講係興奮嘅，但對我而言就有種會緊張嘅感覺。」
「緊張」與「興奮」從來只差一綫，內心泛起這些情緒，大概源於不熟悉、不習慣、不可料，就如第一次飛往日本東京旅行，無論事前做了多少準備工夫，只要在繁忙時間身處「超級車站」新宿站的轉車大堂，或者站在「世界最著名路口」之一的澀谷路口旁邊等過馬路，都會有種按捺不住的焦慮和激動交疊，我猜，「劉謙」之所以會如此，是因為在旺角看見的事物，根本不會在大埔遇上，「大埔最多嘅（店舖），其實頭先（拍攝期間）都有經過㗎喇，就係生活用品店，或者係街市呀，五金舖呀，嗰陣喺旺角（見到的店舖）對我嚟講，未必直接同生活有關，例如貼紙舖、機舖，對我呢個『大埔仔』嚟講係好少接觸，信和（中心）都係好大個先知道有呢個地方，可能九龍嘅人或者會熟悉啲都唔出奇。」
大埔是家也是「唞氣位」
「劉謙」說，經過中一這趟難忘「出城」之旅，往後上學的日子，大多在大埔與沙田（體藝）之間往返，直到升讀高中，才逐漸多了機會踏足九龍。「當時我仲係讀緊A-Level，開始興出去補習，搵嗰啲補習天王，就係咁，出多咗九龍唔同嘅區，因為要遊走唔同地點補習。」出九龍也許不易，去港島更是遙不可及，「一個『大埔仔』出到去九龍已經係好新鮮，港島區直頭係另一個世界，另一個Vibe嘅感覺。」終於等到預科畢業，入讀香港演藝學院戲劇學院後，「劉謙」才需要乘坐307號過海巴士，從大埔中心出發，到分域街下車，步行往坐落對面的金鐘校園，逐步拓展他在港島區的「版圖」；及至後來入行，全職投身幕前，因為工作瓹窿瓹罅，九龍與港島再也不是甚麼「神秘領域」，而是「一面鏡」，映照出大埔這個地方就是如此美好，就是如此適合自己生活下去，尤其是廿幾歲開始，當愈來愈了解自己的時候，「劉謙」發現，工作以外，他需要的是一個「唞氣位」。
所以當很多人覺得跟父母住在新界太遠，千方百計想找機會「回歸」市區生活，「劉謙」卻從來沒想過要搬，即使現時不再居於富善邨，仍舊選擇繼續在大埔住下去。「我從來唔覺得住大埔太遠，想搬出市區，因為可能我個人真係太怕嘈，同埋太怕多人喇。以前成日都要搭一程307由大埔返演藝，住市區嘅人可能會覺得：『你差唔多每日都要坐成個鐘頭車返學，會唔會好遠？』其實搭慣咗，就唔覺得嘅，咪喺車上面瞓覺囉、睇書囉，或者預備一啲返學之前要準備嘅嘢。」「劉謙」解釋，正因大埔與市區之間存在距離，回家的旅途好比一種心理提示：是時候放下工作，好好休息。「有時出去做完嘢，某啲人嘅『休息』方式係約朋友去酒吧飲嘢，但我嘅方式係，好想即刻快啲返去大埔……你畀我想像，如果我住市區，就會有種：吓？我喺市區做完嘢，又要返番去市區（的家），咁樣唔係太畀到我一種休息或者離開咗工作嘅感覺。」
說了那麼久，到底「劉謙」喜歡大埔甚麼呢？「其中一樣嘢係，大埔唔係好Modern（現代化），我個人唔鍾意太Modern嘅嘢，呢度亦都唔係一個好忙碌，或者好熱鬧嘅地方。大埔對我嚟講相對上係有少少鄉下嘅感覺，但佢所有嘢都齊整，佢同人嘅生活好Related，身邊會有好多公園，你會見到有好多人跑步，同時間又有海，有吐露港，呢啲嘢都會令我覺得，好似喺大埔會容易啲感受生活。」所謂「感受生活」，可以理解為善用社區環境，調適身心，紓解壓力，富善邨一直都是建構「劉謙」人生的重要環節，所以現時屋邨及周邊範圍，有幾個地方都充滿回憶。
沉思放空的小天地
第一個是毗鄰香港道教聯合會圓玄學院第二中學的空地。「劉謙」記得，唸高中的時候，有次跟母親吵架後，竟然去便利店買啤酒，然後坐在空地上獨自喝進肚裏，「唔知點解嗰陣時唔飲啤酒，但（因為）覺得啤酒係可以發洩嘅，就買咗喺空地度飲囉。」脾氣會完，情緒會過，漸漸這個空間就成為「劉謙」的小天地，若遇上工作太辛苦，或者想不通怎樣演一個角色，他都會走到這裏，或發呆或沉思，包括他需要在《梅艷芳》（2021上映）扮演張國榮前的一段時間。「（拍攝）嗰陣時都面對好多困難同困擾，就成日都會去嗰個空地度放空。」
另一處是富善邨停車場頂層的球場，是「劉謙」的自我訓練基地。「中學階段就會踢波啦，會打波啦，有好多自我訓練都係喺嗰度發生，包括有一期打籃球，我想練跳高，就喺嗰個位，有好多唔同嘅樓梯呀、櫈呀，我就會用呢啲去練習跳高；踢波又係啦，有啲窿窿位，（嘗試）點樣射波射入個窿度。」
第三個就是完善公園和大埔海濱公園一帶，既會去做運動，亦會在附近散步，開心會行，不開心？更加要靠兜來兜去驅散鬱悶。「好有印象係，（以前）好多時唔開心，都會喺海濱公園，甚至係沿住林村河一直行返屋企。我係好鍾意散步㗎，當我排舞台劇有陣時排到好攰，或者啱啱開始出嚟拍劇拍戲，都會有好多前期準備嘅功課，未必會成日Stay喺屋企預備，有陣時會落公園，一邊行一邊記台詞，或者漫無目的咁兜嚟兜去，嗰種『兜』係有少少可能畀自己放鬆。」
不擔心會有其他人認到自己？「其實唔係好多人認到我㗎喳，特別係大埔區，所以呢樣嘢都令我覺得舒服嘅，一檬我自己都唔係真係知名度好高啦，如果係認真嘅，有陣時咪Friendly地影張相，呢樣嘢唔係對我造成好大困擾，唔會話我做呢行就要好Protect（保護自己），我自己反而Prefer係，要繼續過正常生活，我要好好咁融入社區去生活。」
「劉謙」做領隊的大埔一日遊
從孩提時代至今，「劉謙」都以大埔為家，我好奇，到底有沒有一些「大埔人」的獨有特質，令他不受虛浮的名聲影響，踏實做好自己的工作？他說，大埔人可能予人相對單純和樸實感覺，或多或少令他的血液裏也有部份「大埔人特質」，「如果我唔喺大埔長大，係喺港島長大，我答唔到你有咩唔同，但我覺得個人嘅Vibe會有少少唔同囉。（作風）撲實嘅話，呢個同大埔都有啲關事……呢區人與人之間嘅連結都係強嘅，或者嗰種單純同空間感，會畀我多啲時間去沉澱同消化。到底係我個人比較踏實，選擇咗（留在）大埔（繼續住），繼續咁有距離去睇呢個城市同我嘅演藝生活，還是因為大埔本身個氛圍影響到我，令我變得更加踏實呢？好難講，我諗係有少少相輔相承。」
「劉謙」喜愛自己的家，去到渴望能夠推介朋友變成鄰居的程度，可是搬家到別的區域並非一蹴而就，先來一趟一日遊，嘗試感受一下大埔的魅力如何？就由他來擔任領隊吧，「如果有個人話要（來）大埔一日遊，我先會帶佢去食啲大埔特色食物，譬如大埔新街市（大埔綜合大樓熟食中心）有一間豬扒麵（東記）係好好食，係粗麵，可以會帶佢去嗰度食個Lunch先囉，然後就有機會帶佢行個短山，And then（之後）就去大埔海濱公園碼頭，或者喺吐露港（公園）一齊望日落。，去到夜晚再食餐好，譬如翠怡花園嗰邊，即係太和邨嗰邊其實好多嘢食，有韓國嘢、日本嘢、烤魚、小菜都有，水準都係比較高。」假如大家未有搬家的打算，但又對大埔區有興趣，不妨參考「劉謙」的建議，找天到那裏放個假吧。
Interview & Text： @yautaitung
Video Directing： @kkw___
Camera： @joffecheung , @wkyannnn
Video Editing： @wkyannnn
Photography： @nickyjai
Hair： @hinwan @iiAlchemy
Make Up： @wi11wongofficial
Wardrobe： @paulsmithdesign
