由speed dating變成交友app，由落老蘭變成去觀濱，對「戀愛報stage」的不同理解；世代間對「戀愛」這回事的種種想法差異，向來是使人津津樂道又充滿分歧的一大話題。
510、Angelina、Stone身為青春無敵的GEN Z一代，對於何為愛情，固然有著屬於自己的一套。這次，讓我們聽聽三位忙著吸收忙著發光的花草，在戀愛關係及演藝工作方面，到底是偏向遵循傳統，還是樂於想像與顛覆。
分黨分派的一代
在討論GEN Z的愛情觀之前，我們也許要先搞清楚，到底何為GEN Z？
「其實我覺得GEN Z係有唔同派別，因為大家未必係一個有咁多集體回憶嘅世代。」510認為GEN Z成長於資訊爆炸的網絡世界，大家接受的資訊不再是「大台」主導，而是可以任意接收不同媒介或渠道之下的外國、亞洲或本地文化；縱然生於同一世代，對愛情的看法也可以相距甚遠，或前衛或保守。那不知對於愛情，三位抱有何種想像？
訪問期間不斷被戲稱「戀愛腦」的Angelina笑著說：「我心目中嘅理想愛情關係就係可以一齊成長進步、互相扶持，可以陪伴對方，支持對方。」傾向細水長流的Angelina認為分享欲其實是維持關係的要點，儘管只是聊聊日常瑣碎事，但只要能夠見面，能夠隨意談天說地，便已經感到十分幸福。
至於510，則以「我想和你無所事事」來形容她心中的浪漫：「有一個時間，彼此可以一齊hea吓，其實已經好難得，好珍貴。」510補充，保持「吸引力」是她在關係中極其重視之事，皆因吸引力其實是來自於雙方都不斷進步，保持魅力，結伴去成為一個更好的人。
至於三人當中的男生代表Stone，則出乎意料地成為「儀式感」之鬼：「去到節日，或者係我覺得重要嘅紀念日，我就會好鍾意『搞event』。」 話音未落，身旁兩位已不禁失笑，左一句「你冇邀請我嘅」，右一句「有冇PR gift（公關禮物）㗎？」，Stone隨即一臉認真地補充：「我好鍾意plan晒成日嘅流程，準備好多唔同嘅驚喜俾對方，即係可能突然整份禮物出嚟，或者如果嗰日係紀念日，就整夠12份禮物，一個鐘抽一份。」510聽後不禁笑著補充，在愛情上，Stone確實是位充滿鬼主意的男生，甚至時常提出些甚有戲劇性的想法；但這亦代表他十分重視關係，才會願意在日常相處上盡花心思。
當代愛情故事
在網絡上，時常有年輕網民感嘆這是一個「真愛已死」的時代；有趣的是，同時也有大量自稱「純愛戰士」的網民，字裡行間流露著對愛人的默默付出與一片情深。身處這自我意識強烈，重視個人成長的年代，「愛情」的價值會否大打折扣？
「我覺得愛情喺而家呢個世代絕對冇變得唔重要，人係需要愛。點解咁多愛情片或者偶像劇仍然咁受歡迎，就係因為作為人類，大家都需要呢種抒發。」510補充，現時年輕人傾向關注自身，重視自身需求，好像變得相對理性，不再容易為愛情傾盡所有；她有時也會浮現「當人變得更理性，愛情這件事會否失去意義？」這類疑問，可是不久便發現兩者其實是相得益彰：「兩件事好似唔算太矛盾。我更加了解自己，更加清楚自己需要咩，咁當我選擇伴侶嘅時候，可能就會更加準確。例如你明知自己冇咩安全感，咁你未必會選擇一個成日去party嘅人。」
現今相處方式五花八門，除了傳統的戀人關係，還有situationship及open relationship諸如此類的關係模式。對於愛情，Stone認為相較於是否天長與地久，這代人其實更重視當刻的相處是否合適與自在：「有時（結伴）終身係無法勉強，唔適合就係唔適合；但我覺得都需要有『我想同佢一齊到最後』嘅諗法，兩個人先會不斷努力去磨合，去為呢段關係作出改變。」
愛戀從來易學難精，走在一起過後，卻時時使人徘徊在似苦又甜之間。Angelina自認屬於愛情裡的傳統派，只要對象、年紀、時機均合適，她絕對願意投入婚姻當中。皆因相比起時興的速食關係，她更追求一種可以互相支持的長久相處：「我所追求嘅係比較似戰友嘅關係。有種可以一齊去面對人生，一齊去行樓梯，一齊陪伴大家、鼓勵對方嘅感覺。」
甜蜜以後
戀愛故事向來有辣有唔辣，當甜蜜感覺漸漸變淡，各種惱人或心酸的感覺便會漸漸浮面。回想昔日已落幕的愛情片段，Stone認為其實是使日後關係可以走得更長遠的養分：「我覺得係留低一份令自己日後冇咁戇鳩嘅回憶，以前會諗點解我要付出咁多去遷就對方，點解我好似失去咗自己⋯⋯之後就會諗多咗自己，例如係我應該點去令自己喺呢段愛情入面，唔會再咁易受傷？因為咁樣先可以堅強啲，同對方行得更長時間。」
Angelina直言自己是位相當重感情的人，若是在感情裡受到傷害，可能需要一段長時間去調整心態，才能原諒自己及對方。但她同時相信，每一段逝去的關係，其實也是一個了解自身需求的機會，弄清自己喜歡具有何種特質的人，或是更認識不同面貌的自己。
「我覺得愛情唔係等一個人嚟愛你，去填滿你本身缺少嘅部分；而係你本身要好愛自己，先可以吸引到人去一齊愛你。通常你識得點樣去愛惜自己，都會更加識得去愛人。」結束一段關係，必定會帶來傷痛，510分享她曾經花了一年半的時間，才放下一段相處了三個月的感情，可是她認為那份傷痛其實是成長的燃料：「我係會化悲憤為力量，然後不斷去增值自己嘅嗰種人。我覺得分手後嗰段時間嘅自己係最有魅力，當然係要沉澱一段時間，但之後就會蛻變成更好嘅人。」
戀愛以外 螢幕之上
GEN Z一代，有著獨有的處世態度，但也經常被貼上懶散、自我中心、短視等負面標籤；與三位談過戀愛話題後，便談到他們最常展露於人前的演藝工作，談話間不難發現，他們對工作表現有多認真與自省。對於自身專業，年紀輕輕的他們其實有著大大想法。
「我覺得我哋其實好幸運，試當真呢個地方係好溫馨，可以俾我哋平穩地成長，有個好安全嘅避風塘俾我哋去吸收，有一班人去幫你，去陪你⋯⋯我哋嘅生活方式好似一個家庭，好包容大家，好願意接納對方生活上或者工作上嘅錯誤，但同時都希望大家會去改善。」
2022年，試當真舉辦校花校草選秀節目。選秀初期，每位花草都記下過十年後的目標，出身於表演系的Stone認為，出道過後的這幾年，其實是忙著吸收；在跌跌撞撞間，學習如何更靠近當初想要成為的自己。身為幕前，除了忙於磨練自身，同時也要學會面對排山倒海的評價，Stone則慢慢學會對負面言論一笑而過： 「佢哋（觀眾）嘅感覺係真嘅，但佢哋講嘅嘢未必啱。我睇咗佢哋嘅感受，但接唔接受，就係我嘅選擇。我想做啲咩，我想點樣去改變自己，其實都係我自己嘅人生，我需要自己負責。」
成為幕前，參與多個演出，見證自己的不同面貌，是Angelina數年間的收穫。「我好鍾意有cosplay成份嘅角色，因為覺得好似唔係做緊自己，可以將我內心調皮嗰面拎出嚟，唔會俾人覺得咁乖乖女，咁正經嘅感覺。每次角色形象有大突破嘅時候，我都會發掘到新一面嘅自己。」對Angelina而言，成為演員，除了可以突破自身，她亦期待能藉着演出，引起觀眾共鳴：「觀眾其實點解要睇戲睇劇？除咗可以抒發到佢哋喺生活中嘅情緒之外，其實就係可以拎到一啲共鳴，我覺得呢件事好重要。」
今時今日，比起螢幕上的演出表現，觀眾可能更留意演員的線下生活。510認為他們屬於網台出身，需要時刻表達自己的觀點與立場，以吸引更多抱持相近價值觀的觀眾支持：「我細個好憧憬一啲未必好需要表達自己，但淨係睇佢哋嘅作品，就已經覺得好吸引嘅演員。」入行數年，510透過鏡頭，透過觀眾，在眾多的嘗試與反思之間，對自己的了解增加不少；她坦言，當刻的長遠目標是成為一位真正的演員，也許當目標達成後，她便會回歸低調，不再表達太多內心想法，更專注於自身的工作表現之上。
