「微塵」——多麼卑微的自處，是我們都不願意直視的存在，但只要在點點微光的照彿下，你總能看到它在奮力起舞，弱小卻不願低頭，以一己之力奮力於世界中存在。拍攝《窄路微塵》時正值疫情，劇組遇到的限制自然也比以往多，而不論戲內戲外，對新晉導演林森來說，「電影路」本身也是條「窄路」，「的確係好難行，甚至大家行過呢條路、好辛苦咁一齊行到今日，而且你預計到將來都一定會好難行，條路的確好窄，但只要你一日都仲係好想生存，一定會有方法可以令你走到落去。」
路雖難行，但總有些肯定能轉化前行的能量。《窄路微塵》的男女主角及配樂均得到金馬獎提名，當中由黃衍仁負責的配樂，更奪得了今屆金馬獎最佳原創電影音樂獎項。衍仁高興之餘，也寄盼著香港電影的發展，「呢套戲好唔容易，因為佢係好淡呀，但如果觀眾都識得去品呢種味道，就好呀！咁就唔係純粹一種盲撐，而真係百花齊放，即係斬人碎屍嘅又有人睇，明星又有人睇，清潔工又有人睇，咁成個圈就真係健康。」
以微光累積成令人期待的電影世界
《窄路微塵》顯出香港在疫情下的蕭條與滄涼，但以張繼聰和袁澧林主演的兩個角色，窄哥和Candy藉著清潔公司的工作，開始了一場清洗之旅。他們清洗的是城市中的流行病毒，也是二人內心各自難以面對的淤塞。林森想在角色在看見彼此的軟弱而選擇同行之餘，也在可所面對的限制上發揮出人性中的善意，「窄哥同Candy都在各自要面對嘅問題，窄哥阿媽會有啲嘢影響佢做決定，Candy身處嘅狀況又有局限俾佢。」林森說這兩個角色都只是個平凡的都市人，與我們各人無異，但如何在貧苦生活的掙扎中，堅持做些不違背良心的決定，就是電影最想表達的事。二人所面對的限制雖然不同，但身處同一個世界下，所做出截然不同的選擇，又成就出強烈的對立面。
黃衍仁考慮到二人的矛盾，想以配樂塑造一種淡淡的氛圍，做出一系列既輕柔又細小的聲音，成就有出一種將悲哀化成溫暖微光的可能。「演員其實有一個音樂入面，每個演員嘅肢體動作、講對白、行出嚟時，就係已經一個樂器，一種好alive嘅生命。有時角色背後嘅千言萬語，一啲對白冇講到出嚟嘅嘢，點樣可以用音樂去揾嗰個layers出嚟去幫手講嗰樣嘢呢，我都會係人物嘅心理狀態上著手。Candy同細朱呢兩母女方面，我用咗ukulele去佢為佢哋一個主線；係窄哥嗰邊，就係空心嘅木結他。呢兩種樂器其實好少係港產片作為一個lead住成個配樂嘅用法出現，但我幾鍾意去諗除咗話可以令呢套戲點好之外，仲可唔可以有啲新鮮感去俾到觀眾呢？」〈在路上〉作為電影的主題曲，聽起來不鮮明也不張揚，以那一種淡如水般的低調，滲透出一切難言的所在。黃衍仁又笑說，「我好鍾意嗰個情緒出緊嚟嗰吓呢，反而唔落音樂，有時係嗰個情緒爆發完之後囉，或者之前。譬如有好多朋友睇完，話真係好少配樂喎：『有啲位呢凝住會有㗎啦，呀你真係冇喎。』咁我話係呀，真係冇呀。咪靜靜哋，睇多啲佢哋做戲囉。」
在我們去探討電影時，電影本身也在反映地方的文化、觀眾的視野、以及社會中流傳的思想，那麼「港產片」在經歷這幾年的洗禮後，是否又真的刷出了一番新氣象？隨著多套港產電影都相繼錄得千萬票房，確見觀眾重新擁抱本地出品，林森說是當中有一種春風吹又生的感覺，「近年開始有不同題材的香港電影出現，也有更多年輕電影人入行。都係挑戰你用咩方法去講故事，用咩方法可以去overcome現有嘅限制。其實你見到而家啲觀眾，開始接受到多啲新鮮嘢，包括係新鮮嘅題材、新鮮嘅演員，呢個係好好嘅趨勢，希望觀眾都可以繼續再擴闊，再接納多啲唔同類型、唔同新鮮嘅演員。」
他認為一個健康的電影文化發展，除了需要百花齊放的題材，類型上也應該更加開闊，譬如本地短片、紀錄片、或者動畫，其實香港也有很多這類型的創作，但在市場上卻比較少見。黃衍仁此時忍不住打趣說，「林森真係慈父嚟㗎！咪自己Google多啲囉，自己起去search去搵啦，觀眾都應該要一齊進步進化，唔好只係成日諗創作人可以俾到咩你，可唔可以努力啲，唔好淨係睇啲大眾大路嘅嘢呢？」二人相笑，林森又說，「係囉，再長線啲去睇啦。我哋好窄㗎咋。的確你見到呢段時候係好難以置信，某啲觀眾係好厲害，同一套戲會不斷睇幾次。希望大家係由只渴望去睇本地電影，慢慢會變得更認真去睇，去認真對待。」衍仁點頭，「或者可能過埋《窄路微塵》呢就知道，究竟觀眾係一個咩狀態！繼續支持、然後討論、批評、繼續進步。」
