FANS專訪：歌迷的自我修養

追星這回事，一向評價兩極。投入其中的追星一族，不論為心愛之人投放多少心力，都仍然在所不惜，甘之如飴；至於未嚐過追星滋味的旁觀者，也許則覺得是浪費時間、倒錢落海的不智之舉。幸與不幸，從來是自己說了算。不論外間幾多反對我愛你的聲音，歌迷在追星期間所獲得的滿足感，全都屬實，毋庸外界質疑。

趁著這次討論幸福，我們請來數位fans，分別是喜歡林家謙的阿撻、喜歡Alton、Anson Kong、Tiger @MIRROR的華仔、喜歡林家謙與Ian、Jer @MIRROR的阿慢，以及喜歡阿蛋 @Lolly Talk的熊仔，與我們分享站在台下的各種快樂與感動，以及歌迷的自我修養。

成為應援站哥站姐時

這個年頭當fans，不止入場睇show、買唱片、舉燈牌手燈咁簡單，更會花心思做應援、寫文章畫圖、拍片又剪片，遇著頒獎禮季節更要上街拉票⋯⋯集齊十八般武藝，可能為了被台上的他留意多一眼，可能想讓更多人知道他的好，更有可能是根本不為什麼，單純用愛發電，想要把平常不易顯露的滿腔熱情，通通以自己擅長的方式發射出來。

華仔、阿慢、阿撻與熊仔，四位均擁有自己的IG應援專頁，分別有接近甚至多於萬五人追蹤。他們創建專頁的起點，主要是為了自娛，想不到越搞越認真，無心插柳地紀錄著自身的「追星史」——

「有時候我想share佢哋嘅相同post，我覺得好靚仔但冇人明，你知啦追星女好需要情緒價值！身邊嘅朋友俾唔到我，咁不如開個追星page。」身為「畫手」的華仔，經常在IG發佈有關MIRROR的插圖畫作。自小喜歡畫畫的華仔，疫情期間因著無聊，隨便點開MIRROR的綜藝節目，誰知一看愛上，便在平日繪畫原創插畫以外，多了繪畫fan art的習慣；後來更自發印製、或與各fan club合作推出應援，自娛的同時亦與其他fans同樂。

搶唔到演唱會飛、撲唔到唱片，應該是眾樂迷共同的痛，這也是阿撻當初創建專頁的契機：「當時出緊《(seven)⁷》（林家謙第二張個人專輯），覺得一定得好少貨，嗰一刻我諗，我買唔到，人哋都買唔到⋯⋯所以我就開咗個page，喺銅鑼灣過緊馬路去CD Warehouse嘅時候開嘅，之後見到有碟就喺page同大家講聲。係冇咩深思熟慮過，亂嚟。」阿撻笑說，起初並不打算創建專頁，不過一次偶爾在個人IG寫下「矯情」文字，卻被林家謙本人看見及轉發，引來身邊朋友的好奇及討論，她才想在現實生活隱藏自己的「迷妹」一面，把熱情全部安放於專頁內，亦定期為大家整合活動資訊。

現今樂迷除了關注歌星動向，更會留意歌曲或演唱會的背後故事。對阿慢而言，有了fan page作分隔，她更容易向幕前幕後提出問題或進行討論：「我用真人account去幕後、樂手IG留言，話你真係做得好好呀，件事好似好奇怪，但當你套咗一個追星族、或者支持者嘅身份，佢哋就會覺得呢啲留言係sweet嘅、順理成章嘅⋯⋯睇落會合理啲。」至於熊仔，由於本來已有拍攝剪接的技能，開設專頁除了自娛，其實也希望替偶像出一分力：「佢哋（Lolly Talk）可能冇太多資源去做宣傳，所以我作為fan，就純粹想行多一步⋯⋯想contribute到一啲嘢，幫手keep住有嘢發生。」

追星追出幸福感

仰望偶像的方法層出不窮，沒有既定標準與量度方法，唯有追得快樂才是正解。有人喜歡loop歌買周邊，有人期待到現場近距離接觸、歡呼吶喊，也有人偏好努力做好推廣工作，讓更多「街客」感受到歌曲的誠意。「我覺得每個人都喺自己嘅追星歷程裡面⋯⋯好似沙漏咁累積緊一啲嘢，呢啲係追星會帶嚟嘅幸福感。普通睇show已經好開心，如果你參與更多，就會得到更多嘅開心，但你唔參與係咪有問題呢？唔係㗎喎，聽完歌睇完show其實都已經收穫到幸福感。」

阿慢接著分享，自己偏好富有故事性的演出與創作，因著社交平台，創作人與樂迷的距離拉近，因而能夠了解更多作品背後的思想碰撞——

「要視乎唔同人唔同作品，如果係林家謙，佢好鍾意大家用自己嘅方式去解讀故事；周耀輝嘅詞都係咁，都係希望大家可以自行想像；但如果係林夕，佢本身嘅佛學、文學底蘊好強，有時啲嘢放咗入詞，而我咁啱睇過相關嘅文章或內容，就會發現原來有呼應到，或者產生共鳴；至於MIRROR成員嘅作品，如果係佢哋自己填詞、作曲嘅話，就可能要透過電台訪問去了解，或者自己去搵同前作之間嘅關聯。」鍾情於數位歌手的阿慢，把聽歌睇show形容成「解謎遊戲」，不同歌手的作品，自然要以不同攻略去破解，假如在拼拼湊湊間覓得多一分線索，便會成為幸福感的來源。

「無論係追星，定係鍾意其他嘢都好，其實你鍾意佢，某程度上都係完成緊自己，滿足自己好想去做嘅一件事。」回望阿撻的追星歷程，最初始於小學，其後亦因此一直醉心流行文化與文化研究：「我想強調呢件事（追星），唔係單純只有我付出，佢都有令我創造同拎走好多嘢。」無論是因著追星而認識，後來漸漸成為好友的友誼、與偶像的互動，還是從中學到的不同技能，都使她在這個離散世代，覓得一些難能可貴的連繫、一種共同語言，以及一個可以傾注情感的對象：「無論呢個社群你熟定唔熟，但起碼好似有一個同路人。就好似我見到你著利物浦波衫，我就知你係同路人，呢個係我幾想追求嘅感覺⋯⋯如果鍾意埋同一粒星，仰望緊同一個人，就好似更加有相連嘅感覺。」

訪問當日，是熊仔前往日本看Lolly Talk海外演出的前一晚，他直言追星追久了其實會產生一種奇幻感，也可能演變成一種精神寄託。熊仔剛「入坑」，便遇上Lolly Talk邀請歌迷一同拍攝〈七姊妹星團〉MV，縱然當時是通宵拍攝，但那個一起等待、一起捱眼瞓的晚上，實在是一世難忘的獨特回憶。後來，熊仔間中與其他粉絲專頁合作，一同舉辦實體應援活動；為心愛之人付出固然熱血，但最為幸福的，仍然是見到歌星親自到訪打卡，或是用心回信：「係真係好感動，因為其實我都係一位好渺小嘅fans，但佢哋仍然會見到。」

追星這件事，本質也許很簡單，未必需要太多高深理論支撐。就華仔而言，只要僅僅看到歌星的新動向，便足以樂上半天：「我自己就好簡單，嗰種幸福可能係你學業或者工作好攰，然後打開IG，就見到偶像post咗嘢、見到Alton開緊打機Live，就覺得好開心。」華仔又言，追隨偶像的同時，個人成長也是不可或缺，例如當你留意到他轉了曲風，那自己變相也認識到一種全新的音樂風格、樂器，或是舞種。正所謂「追星使人進步」，華仔一路追星，一路習成剪片、設計、調色等技能，與其說追星是單純仰望光源，倒不如說是隔空結伴成長，在不知不覺間建立更成熟的自己。

追星與現實在天平兩端？

生於這世代，有時難免需要一道逃生門，以供暫時逃離現實，讓自己有機會喘口氣。有人選擇做運動，有人選擇看電影⋯⋯而他們四位，恰巧都選擇了追星。

「我覺得可以令我喺現實生活有一個逃離出口同空間。你拎住演唱會飛，就會諗住我今晚有得睇show啦！我要準時收工！會覺得有嘢係值得你去期盼同期待，呢件事對我嚟講好重要。」華仔如是說。至於自認「花心」的阿慢，則言她現階段的興趣的確是睇show，除了「本命」的演出，其他感興趣的演出也會通通進場支持；再加上平常喜歡看電影與展覽，這樣說來，其實不單是追星，而是應該說成「娛樂」這件事，佔據著她生活的最大部分：「其實的確係幾花時間，但我覺得都係一種生活嘅期盼。而家啲人成日講Work-Life balance，你平衡完，
剩低嘅時間其實就係追求快樂，只不過而家我嘅快樂來源就係娛樂；可能將來當我有其他追求嘅時候，我就會拎呢啲時間去賺錢。（笑）」

阿撻回想，起初想把現實生活與追星分隔得遠一點，為免尷尬，亦想向身邊人隱瞞應援專頁的存在，可是朋友還是很快便發現了，最後演變成互相陪伴大家，去追各自的本命：「我試過幫朋友舉MIRROR成員燈牌，好得意，一齊投入追星。」她又分享，由於工作需要，她很熟悉作資料分析及整合，於是嘗試實踐在應援方面，例如與其他fans一起聯絡台灣的CLS（林家謙歌迷暱稱），進行台灣市場的資訊搜集，了解歌迷是何時、以何種途徑認識林家謙，還有希望他與什麼台灣單位合作等等⋯⋯「其實好想俾林家謙知道，有人支持佢，或者佢有粉絲都唔係一種僥倖，因為原來真係有好多唔同地方嘅人，因為唔同緣故而聽過佢歌⋯⋯想話如果佢有心想衝出香港，唔知呢啲可唔可以俾到少少信心佢。」

他們的最喜愛歌曲

在這個平日的下班時間，本以為這四位歌迷難免會帶著半點倦意，可是不知不覺間，大家談了很久很久。大概是因為每當我們談起心愛之人、所愛之事，眼裡總會透著光，滔滔不絕。

來到訪問尾聲，筆者好奇四位各自最喜愛的一首歌，他們認真思索了一會，隨即繼續娓娓道來——

阿撻：「我嘅人生之歌係〈特倫斯夢遊仙境〉，我想呢位特倫斯，可以繼續夢遊仙境。我覺得呢份歌詞好跳脫，好反映到我嘅心情，好想去做呢樣嗰樣。同埋好反映到我心目中嘅佢，或者佢個人本身係點樣。希望佢可以繼續做自己，迷上荒謬。」

華仔：「我最鍾意Alton嘅第一首solo歌，〈道路使用者的有型守則〉，呢首係《勁騎26》裡面嘅主題曲，係佢自己填詞。呢首歌我係開心又聽唔開心又聽，陪我過咗好多個低潮，有時覺得deadline好辛苦，我都係聽呢首歌⋯⋯你哋有時間都可以去聽，就會明白我點解會咁鍾意，因為佢真係俾咗好多力量我。總之每次唔開心，我一定會先聽呢首歌。」

熊仔：「我會揀〈數到十〉，其中一句歌詞我好鍾意，『能撐多遠／多不死心 ／就撐得多遠』，呢句除咗係佢哋嘅歌詞，亦係呢一年入面支撐住我嘅一句，因為真係好多嘢都唔容易，但如果堅持多一陣，可能就會有啲新諗法，然後可以繼續撐落去。」

阿慢：「我想三位歌手都各揀一首！（笑）我最鍾意嘅都係〈特倫斯夢遊仙境〉，因為呢首歌其實係我啱啱入社會之後，對我人生好重要嘅一首歌，裡面有一句『我眼𥚃／有峻嶺／有大海／看到了／去到了／從此不再歸來』我覺得呢種好豁達嘅心境，同埋嗰種好似企喺山嶺之巔，去俯瞰一切嘅嗰種狀態，我係好鍾意⋯⋯但如果心情唔好嘅時候，我會對自己講嘅嘢，可能就會係Ian嘅〈地球上的最後一朵花〉，最鍾意嗰句係『烽煙不會永久侵佔這一章／微光終會遇上』，呢個係描繪緊一種好低迷，但你要相信身邊依然有光嘅狀態⋯⋯然後如果真係有時要鼓起勇氣嗰陣，我就會聽Jer嘅〈迴光物語〉，佢最後一句係『最後我／石破天驚／來全力粉碎／新與舊／星宿／同創造／一刻天荒和地老』，有種去到最後，用盡全力去爭取一件事，或者去打破一啲嘢嘅勇氣喺入面。我唔同時間都會想聽唔同嘅歌，每位歌手都有對我嚟講好重要嘅作品。」