三叔公園 重遇Y2K的自己

千禧年，一個當刻充滿未知、充滿想像，現在回味則充滿美好的燦爛年代。近年流行Y2K，這個風潮背後，除了是懷念一個時代，也許亦是想念當時輕狂又氣盛的自己。這個聖誕，余迪偉、鄒凱光（灘叔）、阿Bu聯同一眾演員，把千禧年代搬上舞台，以《Y2K前的綁架》為名，演一場致成長的戲， 在鎂光燈下重遇當年的自己。

千禧之味

「有人話一個人經常懷念咩年份，就代表嗰個年份最開心。」這次兼任編劇與演員的阿Bu，千禧之時才不過18歲，是真正成長於千禧風潮的一代，這次選擇在舞台上話當年，正是因為對Y2K帶有特別情意結。迪偉形容，那是一個充滿轉變的年代，不論是千年蟲危機，還是種種社經波動，都顯露出千禧專屬的不確定性。至於灘叔，則認為千禧雖不算他的成長年代，卻是他的瘋狂時期的終章，印證他的醉生夢死。

這次，三位會飾演年輕的自己，再次經歷那段美好年華。在思考劇本與舞台呈現時，阿Bu並不希望大家懷念一個年代，皆因最該懷念的，其實是當時的自己：「成長就係一場自我綁架。其實成長，我哋係交換咗好多嘢，失去咗好多嘢，有時可能係自己綁架自己，例如綁架咗價值觀，或者一份感情。」把成長的痛寫進故事，不一定要哭喪著臉，這次的喜鬧劇舞台，他們想與觀眾一起開party，盡情嗌盡情笑。阿Bu更曾經幻想，邀請大家6時來到現場，先開party當作熱身，玩到8時才入場，此時灘叔笑著回話：「有酒嘅話，可能8點已經冧低晒，開唔到場。」

談起懷念年輕的自己，阿Bu坦言：「我每日都懷念以前嘅自己，今朝起身好眼瞓嘅時候都好懷念，因為醒起以前通頂之後可以繼續做嘢，但我琴晚只係瞓得唔太好，起身就已經好攰⋯⋯有種好唏噓嘅感覺。」灘叔聽後接著分享：「你成日以為自己重係以前嗰個自己，點知你發現自己嘅身體能力，已經fulfill唔到以前（嘅生活習慣）。」他回想從前常常通宵寫劇本，寫到天光便落街買椰賓吃，誰知年月原來在劇本與劇本之間光速流逝，現在若要執筆創作，早在凌晨兩點多便會斷電找周公。

The show must go on，正如人生只能一路向前，無法回頭。在懷念過去的同時，思考現在的自己還可以做什麼，亦是他們這次想與觀眾一同找尋的答案。也許正如迪偉所言：「every day is a new day」，儘管時光不能重回，我們總可繼續結伴出發，成為一個更進步的自身。

Y2K後的創作

話及千禧年，那個未有太多數位紀錄的年代，人人自由自在、笑意盈盈，創作者與接收者齊齊笑成一團的景象，當年見慣不怪。灘叔最懷念的是當時的快活：「同觀眾一齊，大家台上笑，台下又笑，呢啲就係我2000年成日過嘅生活。每晚一班人出嚟，大家笑呀笑，走嗰陣永遠都有人講『今晚笑夠啦，撇！』。」不像現在這個資訊爆炸世代，總是只有你笑我，然後我再笑返你；灘叔期待藉着這次舞台，能夠再度感受「台上台下一齊笑」的歡快氛圍，這是他真心懷念的事。

電台、電視、電影、紙媒、YouTube⋯⋯眼前三位創作者分別涉獵過眾多傳播媒介。當刻的網絡年代，各種圖文各種影像簡直可謂滿天飛，身處這個創作方式與傳播渠道均日新月異的世代，三叔會否有著難以追趕時代的焦急？

「作為一個創作人，其實從來都追趕唔到。」灘叔聽後交出這個回答。與其說是追趕時代，灘叔認為創作人真正追趕的，其實是自己：「你做完出嚟，覺得唔得，就要自己追返自己。然後有日你覺得『得』嗰陣，隔籬有個人望住你，問你『得咩？』，咁你又會覺得唔得，又要再追。」這種無窮無盡的追求，不分年代，同樣難搞，偏偏是創作的最大樂趣。

「有時我會覺得，創作從來都係一件好私人嘅事，你要去追求（流量）其實都冇咩意思，不如問下自己究竟鍾意啲咩，呢個係比較重要。」阿Bu提起今次的劇主要講成長，但成長是否今期最流行？倒也未必。但他認為與其讓流量去決定創作，不如還是以感覺為先——「你要真係對嗰樣嘢有感受，先會寫得好。」

成長的喊話

既然《Y2K前的綁架》是關於成長，筆者好奇三位會否對正值急速成長期的年輕一輩有話想說？不出所料，答案仍舊非常「三叔」。

灘叔：「永遠唔好聽大人講嘢。大人講俾你聽嘅嘢，點完頭，用返你自己嘅方法去做，哪怕失敗，個失敗都係你一手一腳做出嚟。」

迪偉：「你要記住你嘅history。無論你經歷嘅日子係點樣都好，都會堆積成為今天嘅自己，越堆積得多，你人生經歷越多嘅時候，你嘅明天係會活得更開心更好。」

阿Bu：「求先佢（灘叔）話唔好聽大人講嘢，但佢（迪偉）啱啱又講咗嘢，但如果你聽佢（灘叔）講話唔好聽大人講嘢，就真係唔聽，咁你又會聽咗大人講嘢。（笑）

所以我想表達嘅係，其實唔同人都會有唔同意見俾你，有啲人叫你聽邊個講嘢，有啲人叫你唔好聽邊個講。我覺得你全部都可以照聽，聽完就算，到突然間你做咗某啲嘢，你會發覺原來有人講嘅嘢係真，咁就會有所領悟。

『聽』係冇咩意思，聽完都唔使特登記，身體自然會幫你記住，然後到你真係瀨咗嘢，或者做啱咗，就會醒返起嗰段說話。」