金茂坪戲院荒廢30年「唔拆又拆」保育人士袁智仁驚訝地產商轉軚:覺得被騙

採訪、撰文:游大東

一個尋常的星期五下晝,跟全民保育行動發言人袁智仁(又稱「原人」)來到觀塘曉光街四十號;時值九月中旬,太陽依舊猛烈,四周幾乎沒有風,格外翳焗,離開車廂數分鐘後,大家早已汗流浹背,「原人」從Tote Bag(手提袋)裏拿出小手巾抹身,我則在旁邊一家士多買來一支烏龍茶解渴降溫。這裏位於秀茂坪邨對落,與經常塞車的觀塘道與港鐵站,相差大約十五分鐘車程的距離,位置非常「吊腳」,然而有必要到此一趟,只為趕在金茂坪戲院遭封上圍板之前,緬懷一番,說聲再見,因為發展商華懋早前宣布最快10月會將此處清拆,重建成為電影文化中心。

 

這座單幢式戲院,毗鄰旁邊的曉華大廈與富華閣,三者本屬「連體嬰」,翻查地產公司的資料,兩幢住宅同於一九七八年三月入伙,金茂坪戲院則由一九七八年十月起開始營業,開幕當天,院商邀請到在佳視劇集《射鵰英雄傳》之中飾演「香港第一代郭靖」的白彪、《每當變幻時》(1977)原唱薰妮,還有來自邵氏電影公司的潘冰嫦、艾飛,以及當年尺度大膽、在深夜播出的佳視成人節目《哈囉夜歸人》主持之一廖淑儀出席剪綵儀式,場面盛大,確立了這家戲院作為周邊居民「消閒娛樂中心」的地位和集體回憶,包括「原人」的妻子。

 

靠街坊價吸引秀茂坪居民

「我太太以前就住喺秀茂坪,所以成日同我分享呢度睇戲嘅點滴,佢話爸爸成日都會同佢兩兄妹一齊去睇戲,因為係『街坊價』,比較平,同埋以前一個大人去睇戲,就會拖埋兩個細路『免費』入場。佢仲話,嗰陣時又唔覺得有鬼,因為農曆新年先會去睇戲,而且都係笑片,成千人一齊笑,氣氛好好!」的確,當時的秀茂坪徙置區,跟慈雲山一樣(共77座)都是「半山大區」,共有44座舊式公屋大廈,人口數以萬計,加上位置偏遠,若然一家大細想開開心心睇場戲,又不想太過舟車勞頓太過「重皮」,「金茂坪」絕對是「平靚正」的不二之選,再聽「原人」這樣說,無需穿越時空也能夠想像得到,那些年戲院定必生意滔滔,而對出的曉光街一帶,總是聚滿小販:有篤魚蛋的,有炒栗子的,有燒魷魚的,還有賣竹蔗的,熱鬧非常,充滿活力,再看看同一位置如今破落凋零,更逃不過清拆結局,倍感唏噓。

 

以地理位置考量,秀茂坪居民從來都是這家戲院的生存命脈,走過八十年代的光輝歲月,踏入電影業依舊興旺的九十年代,因為附近開始重建,戲院的收入竟也無以為計,很快便因生意欠佳而結業,「金茂坪」一下子在社區徹底消失,就連何年何月何日結束營業也沒有任何資料記載。然而有趣的是,當帷幕落下,業主沒有跟隨潮流,將上址改建為老人院或教會,反而一直丟空至今,轉眼30年,重門深鎖的大門背後有如捲入時間停頓的「異度空間」,無論室內裝修以至座位陳設,跟關門之前分別不大,只是變得更加殘破而已。「原人」解釋:「呢座單幢式戲院,喺香港其實係碩果僅存,而家唯一類似嘅建築,除咗北角『皇都』大家知得比較多之外,好似長洲戲院或者坪洲戲院,都係位置比較偏遠,而且都係荒廢(多時)同埋相當破爛,能夠保留住普通座同超等座,去到今時今日,只係得番『金茂坪』唯一一間,『皇都』都係得番超等(室內部份位置曾改建為桌球室),而佢(金茂坪)係保留咗成個,入到去,成個戲院嘅排場依然喺度!」

 

清拆戲院屢出意外

其實過去30年也不是沒有業主將「金茂坪」改建甚至清拆的計劃,只是每當工程開展,奇怪的事情就會發生。「原人」解釋:「我哋之前都有問過啲街坊,話會拆呢度,但佢哋都話唔會拆到㗎,因為(之前)有幾次試過拆,都發生過工業意外,直情有發展商搵咗人嚟打醮,但仍然出事(有工業意外),所以街坊話呢度相當猛鬼。」他續指,以往曾經聽聞有後生仔專誠到「金茂坪」「探廢」,「之後佢哋蕩失路,搵唔到出路,點解呢?就係話佢哋好似撞鬼!」戲院裏是否猛鬼,人言人殊,但空穴來風必有因,「原人」直言,「金茂坪」這幢建築原先除了播放電影,本身也是承載一個足以改變香港發展歷史的重要地點。

 

1972年6月18日 港島西半山旭龢大廈倒塌 政府新聞處圖片

 

一九七二年六月十八日,連日暴雨,導致港島西半山寶珊道與秀茂坪先後發生嚴重山泥傾瀉,前者令旭龢大廈倒塌,撞毀景翠園,後者因建築地盤泥土滑坡,數以噸計的山泥直衝「雞寮」(即今天翠屏邨一帶),由於當天剛好是禮拜日,結果很多人皆走避不及而遭活埋,事件釀成138死、71傷,單單在觀塘已有71人遇難,成為香港有史以來,死亡人數最多的山泥傾瀉意外,從政府新聞處找來當年在高空拍攝的照片,清楚見到意外位置其實就在「金茂坪」不遠處,當時戲院和曉華大廈及富華閣兩幢住宅仍在施工。「六一八雨災」令全港市民關注,無綫電視決定於六月二十四日,破天荒舉行香港史上首個馬拉松式直播籌款賑災晚會,由當晚八時,直播至翌日早上七時四十五分,共籌得接近九百萬港元,創造紀錄。

 

1972年6月18日 觀塘秀茂坪山泥傾瀉波及雞寮徙置區 政府新聞處圖片 

 

兩度塌山泥促使土力工程署成立

相隔四年,距離一九七二年「雞寮」塌山泥的位置僅200米外(即當時秀茂坪下邨第九座)的一幅填土坡在豪雨下突然坍塌,大量濕泥隨即湧入第九座低層民居及地面商舖,導致18人罹難。同區先後發生兩次冧山泥意外,死傷無數,成為外人認為「金茂坪」等於「猛鬼戲院」的「重要憑據」,「其中一個(例子)喺(電影)《異度空間》都有拍番出嚟,就話有啲人喺(戲院門外)度行過嘅時候,(見到)有對母女,話落雨要擔把遮畀佢哋,點知行埋去嘅時候,就見到佢哋七孔流咗啲泥沙出嚟,所以個鬼故就係話,嗰啲『人』就係當年山泥傾瀉嘅死難者,所以除咗戲院之外,下面仲有個廟(地藏王古廟),亦因為次山泥傾瀉而起咗個(秀茂坪)紀念公園。」他笑言,對很多香港人來說,「金茂坪」的「鬼故」經過多年口耳相傳之後,變成超經典的都市傳說。「大家對『金茂坪』深印象嘅,其實唔係戲院,係呢間戲院嘅特故!」

 

意外之外,還有另一個改寫歷史的事情發生,一九七六年秀茂坪再塌山泥後,為免同類事件再發生,港英政府決定於一九七七年成立土力工程署,亦即今天土木工程拓展署的前身,專責規管山邊及斜坡設計與維修之機構(一九九一年撥入土木工程署,二零零四年再與拓展署合併成為土木工程拓展署)。「原人」指:「香港嘅地產商好驚見到咩?就係斜坡,點解咁驚斜坡,要攞好多錢去做維修?背後就係因為呢兩宗山泥傾瀉事件,所以『金茂坪』除咗係戲院,對我哋嘅城市(發展)亦都影響好大,如果地產商將佢重建,變番做一個電影文化中心,就會令到剛才我講嘅山泥傾瀉呀,我哋嘅城市發展,令到寮屋冇咗呀,斜坡維修好咗嘅故事(歷史關係)消失,對成個文化保育嚟講係一個好大嘅損失。」

 

發展商「唔拆又拆」   袁智仁:覺得被騙!

今年4月有fb專頁指戲院會清拆,後來華懋回應網上傳聞,重申有意活化「金茂坪」戲院,fb專頁後來澄清,指與相關人士了解後,項目活化繼續,相信「清拆」是手民之誤,殊不知不足半年後又再改口,「原人」坦言,當初知道集團確認將「金茂坪」清拆重建感驚訝。「某程度上我都覺得自己有啲被騙,因為我哋(有)幫佢哋講好說話,覺得佢保育番個建築物,就算裏面可能有少少商業元素,都係情有可原。去到今時今日,佢哋將成幢(建築)拆咗佢,我就會覺得,點解你需要喺呢度相對比較偏遠嘅地方起一幢電影文化中心,發展商華懋而家做緊中環街市活化喎,一邊話保育,另一邊就話清拆,呢個唔係自相矛盾咩?!」