世外之音縈繞心頭 馮穎琪、CMGroovy

香港動畫電影《世外》勢如破竹，除了入圍多個外國影展， 更榮獲在11月22日舉行，第62屆台灣金馬獎三個獎項提名－－最佳動畫片、最佳改編劇本及最佳原創電影音樂。

電影自上映以來，本地票房頻頻報捷，引起大量關注和討論，無論是宏大奇幻的世界觀、輪迴因果及人性善惡主題、粵語配音及畫風，都為人津津樂道。不少觀眾形容，看到電影尾聲，百感交集的情緒湧上心頭，鼻頭一酸，不自覺淚眼汪汪。除了因為劇情動人，由周莉婷、馮穎琪（Vicky）及CMGroovy（CM）組成的配樂團隊，可謂功不可沒。

Vicky和CM以配樂的身分，回想關於《世外》的一切，同樣是一趟不可思、不可議的旅程。

埋班配樂的契機
時間回到去年九月，監製楊寶文（Polly）邀請Vicky加入配樂團隊：「本身我同監製Polly係朋友，所以一直都知道佢做緊《世外》，對呢個Project唔陌生，但收到邀請嘅時間，意味著要埋尾、衝線嘅責任，趕得切報外國影展。我唔想喺呢個階段，幫唔到佢仲製造其他問題，所以我要確保佢知道兩件事－－第一，我未做過配樂；第二，我需要一個同我建立咗信任、溝通嘅戰友一齊做，於是我搵咗CM。」

二人加入時，配樂團隊另一成員，台灣音樂人周莉婷其實已做了部分配樂，令二人更放得開，根據已有音樂基礎，構建世外的世界。有趣的是，當時的《世外》在後期趕工階段，仍然是「甩皮甩骨」的半成品，相當考驗二人的想像力－－

CM笑說：「當時好多嘢未畫好，可能有幾秒完整，突然有個蠟筆嘅小鬼，有個箭咀，標示場戲做緊乜，之後幾秒可能係白色，我哋就要問返導演，呢個位其實係做乜。」雖然如此，二人在看片階段，已抓緊一些重要的感覺，作為配樂的輪廓。

配樂的角色
即使看的是未完成版本，CM已被電影的殘酷震撼了：「就算啲畫未完成，當中嘅場面，睇完係會唔舒服，亦有啲擔心唔知點處理，點樣將情感用音樂去表達⋯我諗起有個前輩同我講過，配樂就係要交代畫面、對白、表情冇交代嘅嘢，呢啲睇唔到聽唔到嘅，就用音樂去賦予佢。」

回想起整個配樂工作，Vicky則以「建設性」來形容：「我係一個鍾意諗Big Picture嘅人，而動畫嘅嗰個Picture，更加要一步一步搭建出嚟，如果係拍出嚟，都會有Ambience嘅聲音，但係動畫真係由零開始，每一個聲音都係設計，冇聲更加係一個設計，所以我哋每個場景都好似一個獨立世界，砌完一個又一個，再將佢哋連接。」

框架下展現美學
《世外》配樂既能牽動情緒，讓觀眾感受角色的處境，亦能推進故事的發展。CM提到，導演早有清晰的藍圖：「導演好好，有個好長嘅表，列咗重要嘅場面，個Chart油晒唔同顏色，有大有細，畀我哋感受個起伏，仲講明有咩角色出現，佢哋會做乜，同埋最重要佢想表達嘅情感係乜⋯咁我哋可以喺框架裡面，擺我哋對場面嘅睇法，同埋聲音嘅美學。」導演最大的要求，是要避免音樂有年代或地域的指向性，變相鼓勵二人更大膽投入不同元素，令配樂自成一格。

問到二人最深刻的配樂選段，Vicky認為是電影開場及古蘭的部分：「開頭要想像世外係一個咩地方，其實我未去過都答唔到，可能好靚，可能有啲Mysterious，可能有啲時空上嘅轉移，於是我諗到一個字－－Mind-bending，扭曲嘅感覺，於是搵咗啲似String，但又唔肯定係唔係String嘅聲；另外就係交代古蘭身世嘅部分，我想用比較Melodic嘅方式進入情感，講一個悲慘嘅故事，就用咗Cello（大提琴）嘅哭訴，但唔係要聽落好慘，反而想個音樂陪住大家，同古蘭同步，一齊了解真相同成長。」

CM則提到黑天與段兄人鬼打鬥的一幕：「團隊好早已經定咗，最後打鬥重頭戲係由威哥（王建威）負責，中間呢幕打戲本來亦唔知係唔係我做，但係我嗰時真係好想試下，就算有好多幕要趕工，我都用咗一晚起初稿，等第二日開會畀大家聽，結果個反應都好正面，再聽大家意見修改完，就變成而家呢段，我自己都好鍾意。」

音樂映照內心
不少觀眾看畢電影，聽到陳健安主唱的《如果世外見》，那些畫面和情緒又再湧現，原來這是Vicky和CM的主意，Vicky指：「其實呢首歌，同片尾曲係同一首歌嚟，亦係我哋暗藏嘅密碼。當時我睇咗呢部戲好耐，有好多情緒要宣洩表達，所以導演分派完工作，我三日後就寫起咗。」

Vicky分享了關於這首歌的一段趣事──當時她把Demo交給Polly，Polly說她聽得哭了，但這部戲並不想要愛情歌。Vicky想了想，叫Polly再聽聽，其實這首歌沒有一句講愛情，這只是Polly自己的聯想。如果你想著親人，這首歌就是關於親情；如果你想著朋友，這首歌就關於友情。結果Polly再聽，恍然大悟：「呢首歌原來冇Context，每個人都能夠代入，只要你放自己入去，就反映到你原來最缺失嘅係乜。」

《世外》其中一個重點，是要解開人世間的心結，那音樂是否解開心結的鎖匙？Vicky說：「我好多時都係寫自己感受，所以寫到隻歌出嚟，可以話係嘗試拆解自己嘅心結，但係唔會寫完就冇咗個結。不過有啲聽眾聽完首歌，會話首歌幫到佢去感受自己需要嘅嘢。」這份超越言語的心領神會、靈魂隔空共鳴和被理解的感動，也許正是音樂對人類的重要性。

一往無前的信念
訪問尾聲，提到觀眾對配樂的肯定，二人笑指準時完成配樂工作已是萬幸，沒想過會有這樣的迴響，他們始終謙卑，歸功《世外》團隊：「以我理解佢哋一路走出嚟嘅路，我會話呢個團隊嘅精神狀態，一定係只會向前，個熱血嘅程度係，只要我哋放最好嘅嘢落去，配合到個作品，個團隊會帶我哋去到好遠。」