王道漫畫的主角大多具備一個特質，就是一旦認定目標，便會義無反顧地朝著理想邁進。從二次元拉回現實，縱然日常生活中沒有故事裡的妖魔鬼怪，Ernest潘宗孝（ERN9）卻依然自帶一種「熱血少年」特有的衝勁，在創作路上不斷「打怪」，於跌跌撞撞之間，朝著更廣闊的想像世界進發。
「衝勁」是把雙面刃
「我係一個好隨性好straightforward嘅人，呢種性格其實就係大家見到嘅『衝』。我對於件事一有感受，就會想衝去嗰個地方all in，唔想理其他嘢，淨係想做好嗰件事⋯⋯呢個都係我嘅課題，同埋都係我成日會諗，會去檢討自己嘅地方。」
創作於Ernest而言如同修練，他直言以前其實摸不清何為創作，直至加入「試當真」，從負責度橋、剪接等幕後崗位，再走到幕前擔任演員，才漸漸在由零開始的創作旅程上認清目標，學會好好使用「衝勁」這把雙面刃，不再沒頭沒腦般橫衝直撞。
胡鬧當中的深意
Ernest直言若果對一件事產生興趣，便會不惜翻查字典尋根究底，當話題由創作轉至幽默，他便立即交出記在字典上的「HUMOUR」字義：「幽默係喺荒謬同可笑裡面去發現、表達，以及欣賞當中嘅不協調，然後將佢變成一啲有趣或者好笑嘅事。我覺得講得好好。」對Ernest而言，他習慣在難過事中找尋笑點，從悲喜參半的「黑色幽默」裡獲得靈感，繼而將其放進創作當中，與大家一同在胡鬧當中細味箇中深意。
「唔敢講俾 friend 知我愛戴 Jack／開 threads 數百次 d attack makes me sad ／想攻擊不如學艾倫」正如驟眼看N9新歌〈再見傑克〉的歌詞也許感覺不甚正經，可是若然你認真細味，不難發現字裡行間滿載著Ernest對於創作的熱愛，同時盛載創作人飽受抨擊的辛酸：「可能香港近年嘅風氣真係太慘，我哋需要一啲發洩嘅渠道。而當我哋發洩唔到去真正令我哋嬲怒嘅源頭嗰到，就會好似變咗屋企人嗌交噉。我喺出面明明同朋友相處得好好，但唔知點解我返到屋企，就會發晒啲脾氣落最close嗰啲（人）到⋯⋯我覺得香港係需要一啲新嘅聲音，就算佢（Byejack）喺而家呢個moment，未必係主流好接納到嘅聲音都好，但係如果我哋互相支持，係一定可以將所有創作變得更加好。」
從翻唱影片走至N9隊長
早在加入「試當真」之前，Ernest已在名為「ERNEST PCH」的個人YouTube頻道上發布影片，當中第一條發布的正是〈劃火柴〉的翻唱片段。話及此處，Ernest笑言其實早在少年時期便已熱愛唱歌，當時更想成為一名能夠感動人心的歌手：「嗰陣夾band我喺台上經歷過一次此生難忘嘅表演，我哋係暖場嘉賓，觀眾係中學生嚟⋯⋯佢哋明明唔識我，但唔知點解氣氛好high，high到我覺得佢哋係好鍾意我。最後喺拉幕嘅時候，我好不由自主噉做咗個飛吻。我而家自己講返出嚟都怕醜，但正正係嗰個vibe，令到我投入到做咗個我自己都意想不到嘅舉動。」
縱然Ernest形容自己的幕前形象總是嬉皮笑臉、玩世不恭，可是每當提起音樂、提起創作，雙眼便立即載滿熱情，滔滔不絕地分享他的無盡想法。話及新歌〈再見傑克〉，這次除了找來歌中主角Byejack合作編曲與監製部分，亦是Ernest首次包辦曲詞，初嘗在旋律歌詞當中，盡情投入他的個人情感與想法：「我相信而家都重有好多人覺得我嘅形象係『得把口，咪就係衝囉，唉冇乜料㗎啦呢個人。』所以我要用自己嘅作品去話俾人知，去同自己講，其實我係做到我想做嘅嘢⋯⋯我一定要好用心，慢慢去行好每一步。」
Ernest分享最近除了如常在「試當真」默默修練，亦在表演課堂中得到啟發，學會把自身最真實的最強烈的情感投入創作。近日正埋頭苦幹作曲寫詞的他，渴望把自己的感受通通拋進音樂當中，並期待日後有機會把所思所想化作一隻專輯，邀請聽眾認識一個全新面貌的Ernest。
