2020年年末，香港正值疫情時期，社會籠罩在一片愁雲慘霧之中。當時人人眉頭深鎖之餘，亦開始紛紛在迷霧之間，尋找一些不用出門的新鮮玩意，為求躲在家也能自娛自樂。而Issac與Justin亦正是由這個時間點開始錄製自家Podcast節目，嘗試在這個不怎麼信奉勵志故事的年代，以「勵志鷹」為名，隔空與聽眾一同嬉笑怒罵，笑談心事，一搭一唱地陪伴大家渡過日常的碎片時光。
為求逃離滿室頹廢
「歡迎大家收聽一個又頹又勵志嘅鳩笑節目。」
這樣一句標誌性的開場白，相信對於每位曾收聽勵志鷹節目的聽眾而言都絕不陌生。現在節目上的兩位男生妙語連珠，不論是訪談各界嘉賓，還是回覆聽眾心事都應對得宜，為大家帶來無盡笑聲。不過Issac回想初次錄音之時，可謂不斷撞板，更是首嚐傾偈傾到氣餒的滋味：「就係你以為好簡單，但錄完差唔多五至十分鐘，原來已經冇嘢好講，件事已經講完咗⋯⋯完全講唔到落去。」翻查他們的節目列表，不難發現節目是由第二集〈EP02 –今集同你一樣：好短，但好笑。〉開始，而第一集卻是無跡可尋：「我哋一開始係有試播。如果你上Spotify睇，其實我哋第一集係唔見咗，因為太難聽我們DEL（刪除）咗。」Issac輕笑道。
談起「勵志鷹」這個名字，除了蘊含讓大家聽後不禁莞爾一笑的食字深意之外，其實還源自一件軼事。Justin直言其實二人個性本來就與「正能量」沾不上邊，與其說以「勵志」為名是一種「心靈雞湯」，倒不如說是一種自嘲：「最初係疫情時期，嗰陣有好多社會事件，其實氣氛係好低迷。一開始除咗我哋兩個之外，重有另一個主持叫阿乜，我哋喺深夜買咗幾罐酒，喺band房話錄音前試吓傾偈，然後傾吓傾吓，就話點算呀，傾極都咁頹廢，噉唔得㗎喎。」Issac形容當時不論談天說地或討論大江南北，談話內容都是「sad ending」導向，總是以一片愁緒作結。後來談至半夜時分，他們才徐徐在滿室頹廢氛圍之間，交出了「勵志鷹」這個令人聽後不禁失笑的獨特名字。至於後來不少聽眾認為節目確實暖心，且能在奔波忙碌的生活中得到陪伴及鼓勵，大概是另一個令人意想不到的故事發展。
邊回覆邊學習的心事信箱
雖然節目調性輕鬆明快，但兩位主持亦有著不少真情流露，用心回應小鷹們（勵志鷹聽眾）來信的認真時刻。既然開宗明義稱之為心事信箱，來信固然不乏眾多惹笑奇聞，但間中亦有著些較沉重的人生難關，例如是來自原生家庭的重大創傷，或是受盡情緒困擾卻傾訴無門的來信。面對著聽眾對他們的信任與付託，Issac僅希望能夠透過節目，傳遞一份理解予聽眾：「我覺得有一個必要性，就係話俾某啲人知，我哋係聽到嘅⋯⋯我覺得呢個時代有啲人係好需要，或者有一個渴望係想俾人聽到、俾人見到。」Justin形容他們回覆來信其實猶如「摸著石頭過河」，除了盼能照顧來信者心情，儘量給予合適回饋，但同時亦要維持節目的輕鬆節奏，提醒自己不要過份沉溺於嚴肅氛圍當中：「我諗呢個就係Podcast long form嘅好處，我可以講五分鐘認真嘢，然後用兩分鐘搞笑包底（作總結）；但如果你話有時間限制，好似reels（Instagram reels）噉，反而就比較難⋯⋯但長時間節目就可以做到。」
為何要在「搞笑」當中追求意義？
在有關幽默的討論上，我們常把「幽默」與「搞笑」作比較，研究兩者到底有何分別，更甚是到底哪個較為高級，哪個又較難登大雅之堂。話及這裡，Justin略激動道：「其實我唔鍾意有人分搞笑同幽默⋯⋯我覺得嗰啲人好煩，同埋多數都好唔fun（有趣）。我覺得你可以講大道理嘅時候講大道理，搞笑嘅時候搞笑，點解要追求搞笑嘅時候一定要得到啲嘢？」Issac亦言，與其硬要區分幽默與搞笑這兩個概念，他偏向認為幽默其實是一種思考方式、一個打破既有慣例的過程：「我覺得每次幽默都係有個setup⋯⋯我set up咗一件事，然後有punchline打破咗，就會得到一個unexpected嘅結果，噉就會好好笑。但呢個純粹係一個諗嘢嘅方法⋯⋯如果太覺得幽默係一定要有得嗒（細味）、一定係好有內涵，噉我覺得未必。例如香港人比較難enjoy日式漫才，嗰種一個扮蠢、一個吐槽，因為香港人覺得扮蠢係唔好睇，但呢啲其實全部都係表演性質，當你要去拆（拆解）佢入面係咪有某種幽默，入面有冇嘢想表達，佢就會變得越嚟越唔好笑。」
幽默是悲劇加上時間？
常言「喜劇是悲劇加上時間」，Issac與Justin則認為這視乎於我們到底是聚焦於悲劇本身，還是選擇以笑聲帶過悲傷，扭轉悲劇必然是傷心欲絕的悲戚結尾。「我諗睇你主體放喺悲劇定係笑話到，因為主體放喺笑話嘅話，悲劇就係用嚟鋪墊；但如果主體係放喺悲劇上面，就係我應該點樣去配合已經發生咗嘅傷心事，噉幽默可能係其中一個應對方法。」Justin如此道。
面對洶湧世情，我們應該一笑置之，還是保持憤怒？這樣的討論似是無底深潭，大概永遠說不完。Justin直言生而為人，實在難以長期保持憤怒，或長期開懷大笑，這斷然不是一個能輕易二選一的討論： 「因為識得搞笑嘅人，唔代表佢內心嘅價值觀改變咗；但我都認同，如果有啲人可以堅持到永遠都保持憤怒，噉你咪噉樣過你嘅人生，但我自己就唔得。」Issac亦認為笑意偶爾也是源自荒誕現實、源自內心感受未能消化：「有時有啲搞笑嘅事，都係基於你對某啲事不忿，你覺得佢好荒謬，你先需要去搞佢一個笑。其實冇話邊樣先啱，或者你要揀邊一邊，而係你點樣去平衡你嘅情緒百分比。」
人類情緒向來複雜，既然我們難以長期維持悲憤狀態，倒不如先投入當下，偶爾化悲劇為笑意，在荒誕鬧劇當中穩住內心，悠悠前行。問到兩位主持人會否期待未來的勵志鷹能飛得多高多遠，二人隨即一貫隨意作風，笑著交出一句「唔好太紅，但又唔好太窮。」
也許能夠依舊輕輕鬆鬆地與聽眾聊天作樂，繼續結伴笑看風雲，對於勵志鷹兩子而言，已是剛剛好的一種舒心狀態。
