柴灣是香港一個很特別的地區。這裡是一個三面環山的谷地，而另一面則對住個海，可以見到對面的將軍澳。以前因為盛產木材，所以就被命名為柴灣。不過在開埠之後很長的一段時間裡，這裡都被當作郊區，一直都沒有開發。直至到1949年，因為要應付大量南來的難民，政府才逐漸開發柴灣，讓這個偏遠的山谷，慢慢蛻變成一個自成一隅又非與世隔絕的安居社區。
在柴灣長大的MANSON（張進翹），閒時很喜歡在區內一個人散步。他眼中的柴灣，有城市的熱鬧，有工業化留下的痕跡，更有來自山和海的氣息。「柴灣嘅特色就係佢都幾多樣性，同我創作上嘅性格都幾相似，就係鍾意將一啲唔同嘅元素揉合埋一齊。」正如他的藝名：MANSONVIBES，希望多探索、尋找和感受到更多不同的GOOD VIBES，來豐富自己的創作面向，繼而感染到更多的人。而柴灣所擁有的VIBES，正是他的起點。
在屋邨裡感受生命
兒時的MANSON因為家人的關係，經常要搬來搬去。他住過粉嶺、深水埗、西灣河，可是每一區都沒能待得太久。直至初中時，搬進柴灣，便在興華邨住了十多年，所以他對這裡充滿了歸屬感。「我細個啱啱搬入嚟嗰時，覺得呢個屋邨有啲恐怖。因為佢好舊啦，所有嘢都好霉霉爛爛，啲水管又生哂銹，因為呢條邨嘅樓齡都好大。我住嗰個單位喺走廊嘅盡頭，所以我要經過哂家家戶戶嘅單位先返到屋企。而每次行過，我都會偷睇吓人哋嘅屋企係點。每一家每一戶都好唔同，有啲會封密哂所有窗，冇乜光；有啲就堆滿哂雜物；有啲就有陣濃烈嘅怪味……呢啲都係我剛剛住喺呢條邨時嘅印象，總覺得呢度好適合拍鬼片，哈哈。」
於1976年落成的興華邨，是區內頗有歷史的公屋群，也是最有特式的建築之一。興華邨分別有5幢大樓建於山上，另外兩幢則依山而建。屋邨內設有大型升降機、架空走廊及天台通道，分別連接環翠道及柴灣道。而且樓樓相連，惟所連接的樓層並不一樣，不熟路的人誤走進來，的確有如陷進一座巨大的迷宮之內，好易蕩失路。MANSON也笑說，這裡「易守難攻」，除了很有鬼片FEEL之外，也很適合拍「古惑仔」系列電影，「呢度個結構好複雜，又有好多樓梯四通八達，如果你著草匿埋响呢度，都真係幾難俾人搵到；就算搵到，都好易走得甩。」
當然，對於興華邨的居民來說，這個山城卻是一個充滿人情味的地方，沒有鬼怪的靈異，卻多少有點江湖兄弟的互相關照。「我以前成日會落去樓下間茶餐廳食飯，好鍾意食佢哋嘅福建炒飯，因為入面有好多芹菜。咁我就同老闆娘講我好鍾意食芹菜呀，你可唔可以俾多啲芹菜我呀？點知佢就記住咗，之後我每次食福建炒飯，佢就會同廚房講：喂加多啲芹菜俾佢呀！其老闆娘同佢個仔都好好人，佢哋成日會同街坊傾計，有一種好CLOSE嘅關係。」
MANSON還特別喜歡一個人到邨內的公園流連，原因是那裡沒啥人，很清幽，可以讓他心無旁騖地思考自己的事。「呢個公園冇乜人，就算有都係啲公公婆婆，所以我可以聽住音樂發癲，唔洗理人點睇。不過，我好記得有一次，我响公園HEA緊時，就見到有個阿婆一路行一路唱歌；佢用唱粵劇嗰種嘅聲音唱，把聲好大，喺好遠你都會聽到佢把聲，但佢好似唔駛點用力唱咁。佢呢把聲音，我覺得好UNIQUE，一直都好記得。」
而邨內的社區中心更孕育了MANSON往後的音樂路。「冇諗過社區中心入面，真係有間BAND房，仲有個阿SIR叫阿榮，佢成日帶住我哋幾個朋友去夾BAND。嗰時讀緊中學，初次體驗到夾BAND嘅樂趣，真係超好玩！我真係好享受嗰種用音樂同大家交流嘅感覺。我仲記得我有响社區中心表演過，嗰陣時屋企人都有嚟睇我表演，我係彈結他嘅。佢哋就話我：彈得幾好吖，不過你郁多啲啦，唔好好似一碌木咁企喺到啦。」
但MANSON最喜歡的，卻是邨內的天台平台，他形容這裡更是象徵了他青春的場所。「呢個平台每逢冬天轉季嘅時候，（日落時）都會變成紫色。嗰陣時我讀緊電影學院，好多故仔都係喺呢度諗嘅。而經歷咗一啲失敗呀，或者唔開心嘅事，我都會喺呢個平台上來回踱步，俾自己一個人獨處。有時我亦會喺度曬太陽，因為平台會吸收到好多陽光，我就會除咗對鞋，喺上面赤腳散步，感受當下嘅感覺……好多人會喺呢度曬衫曬棉被，曬咸魚曬中藥，但呢度又有一個好大嘅牌寫住：不準晾衫。所以規矩就係攞嚟打破嘅，哈哈！」
以青春之名去面對未來
與MANSON重遊柴灣，他對區內每個地方都十分熟悉，因為都載滿了成長的回憶。「柴灣公園網球場旁邊個位，我曾經同個教練朋友响度好熱血咁做運動；工業區旁邊個石灘，有年生日曾經同阿媽嚟過吹海風；自己都試過凌晨五點幾散步嚟到呢度冥想；山翠苑嗰邊有條下水道小徑，我曾經响嗰度渡過咗一段幾陰暗嘅時刻，仲寫咗幾首歌出嚟……」回顧過去的成長經歷，MANSON發現這些年來，柴灣其實沒有怎變，區內只是多了個很大的青年廣場，變得最多的只有長大了的自己，以及變老了的媽媽。
對於自身的改變，MANSON有很多反思，尤其是關於青春這件事，如果所謂的「成長」是要令人變成不純粹，那麼擁抱「青春」或許就是一種對抗，即使有可能被冠上各種「罪名」，也願意為了自己的初心，而敢於與「世界」抗爭到底。這些想法，都被MANSON寫進了〈It’s a sin〉這首歌裡。 「身處喺呢個城市，我哋會有好多框框俾自己，例如係我哋受嘅教育啦，我哋成長嘅方法啦，成長過程裡面所吸收到嘅種種嘢啦，電視劇俾到我哋一啲植入式嘅訊息啦……結果就係會令我哋喺潛意識入面，會多咗好多JUDGMENT。而呢啲JUDGMENT可能我哋响小朋友嗰陣時，本來係唔會有嘅，但長大咗之後，經歷多咗之後，先會被其他嘢影響到而產生咗出嚟，然後我哋又會俾呢啲想法，一直左右住我哋往後嘅各種選擇。所以我就希望透過呢一隻歌，去話俾大家知其實我哋首先要去發現有呢啲FILTER，之後甚至可以拎走哂呢啲FILTER，去返我哋小朋友時嘅狀態，去勇敢面對一切。
「〈It’s a sin〉中文版入面重複咗好多次『青春有罪』呢四個字。喺演繹嘅時候，其實每一句都有唔同嘅語氣，有問號、句號、感嘆號，有反問、疑問等等。其實呢啲疑惑，都係來自成長嘅反思，因為『青春有罪』，『青春可能有罪』嘅原因，可能係來自後悔，覺得自己因為受到嗰啲FILTER嘅影響，而『做錯』咗一啲選擇。例如我好鍾意唱歌，但有人會話你唔適合；你追夢係『有罪』嘅，因為你冇TAKE CARE你嘅屋企人等等。面對呢啲被外界所加諸嘅『罪名』，我就想透過呢首歌嚟回應，就係：『IT’S A SIN. RIGHT, BUT WE ARE ALL SINNER 』。如果青春有罪嘅話，咁我哋所有人都係罪人。」
MANSON話，「認罪」要有勇氣，而邁向未知嘅未來，就需要有更大的勇氣，去面對路上將會出現的各種無名恐懼，之後我們的生命才會有變得豐富的可能。而首先要做的事， 就係「面對」，EMBRACE曾經發生過的事，自己做過的選擇，以及一切所作所為，那怕是遺憾。就像〈QUESTIONS〉裡的歌詞：「IT’S A NIGHT TO SAY GOODBYE，TO YOUR REGRETS YOU BETTER GET THEM OUT OF YOUR HEAD」。「我覺得我哋每一晚休息之前，都要去感謝呢一日，有任何做得唔好或者遺憾後悔嘅，都放低佢，趁呢個休息嘅時間，俾自己身體好好休息，去迎接另一日全新嘅挑戰、全新嘅自己。而嚟緊將會推出嘅EP，主題就係面對。希望透過每一首歌，以音樂嘅名義，去重新面對一啲以前自己曾經逃避過嘅事，或者一啲自己唔好嘅習性。而風格主軸都係搖滾，會有好多唔同嘅ROCK喺入面。因為ROCK對於我嚟講，就係去EMBRACE、去愛；好坦白咁，誠實地去同大家分享自己嘅經歷，希望有同樣經歷嘅人唔會覺得自己孤單，俾到力量繼續行落去，同繼續互相支持。」
在〈QUESTIONS〉的MV裡，有一個SHOT是拍到有隻小鳥在大樓的窗外飛過。原來這就是在興華邨裡拍到的。MANSON說柴灣最好的地方，就是鄰近山嶺自然。「經山路你可以選擇上龍脊，行落去大浪灣又得。而當有時遇上一啲瓶頸嘅時候，我就會去行山去游水，咁呢啲微小嘅快樂，都可以喺柴灣搵到，可以用自己雙腳去體驗，令我學識感恩同APPRECIATE自己。」
Interview & Text：Nico Tang、Jenny Chan
Video Directing：Jenny Chan
Camera：Joffe Cheung、Kayan Wong
Video Editing：Joffe Cheung
Photography：Lau Ho Chun
Hair & Make Up:：Kaho Cheng
Wardrobe：YOOX、Valentino
Styling： @unknownscenery_us
