活在資訊爆炸的今日香港，奇妙事不斷有。香港人每日勞勞碌碌，壓力爆煲，實在無力時時笑面迎人，難怪坊間時常形容港人總是不苟言笑，極難取悅。在這「擳都唔笑」的社會，Jordan Leung（@69ranch）偏偏醉心於逗樂他人，絞盡腦汁苦思punchline，為求用一個人一張嘴，以棟篤笑逗樂台前每一張臉。
從外來者變回流者
每個人都有過想要開展新大計的時候吧。有些人會先計劃周詳，有些人則選擇隨遇而安，靜候時機到來。Jordan回想當初萌生「想要成為棟篤笑表演者」念頭的𣊬間，正是極其偶然的一次邂逅：「嗰陣搬咗去New York，覺得喺新地方應該challenge自己做新嘅事。記得有次朋友帶我去睇stand-up comedy show，我覺得啲人幾好笑，但我好笑過佢哋，所以就有動力去試呢件事。」
Jordan自15歲便居於美國，自那次偶然接觸棟篤笑後，他理所當然地在當地繼續發展說笑事業，在無數次的Open Mic與公開演出中漸漸累積經驗。直至2020年美國新冠疫情肆虐，他選擇回港暫避數月，沒想過會因著這場長久戰長留香港，在這裡二次開展其棟篤笑表演事業。Jordan形容當時剛回香港，猶如重新認識香港文化，他認真研習廣東話俚語，「好CHUR」、「好LUR」、「唔GUR」、「HEA」等外國沒有的地道字詞，通通令他感覺新奇：「我唔明點解啲人可以就噉整個字出嚟，然後會每個人都明，我覺得件事幾得意……我想知邊個係第一個寫呢啲字嘅人，好好奇呢件事。我都好想發明一個slang（俚語）。」
由在美國說笑說到回來香港，除了演出內容需稍作調整，以貼近香港流行議題，增加本地觀眾共鳴之外，Jordon亦發現兩地的產業發展上，有著根本性的不同：「喺美國成件事（棟篤笑）已經係好established，繼續講得好啲，（將來）就可以做某個show、上某個TV show，或者Netflix；但喺香港，可能如果要成為黃子華嗰啲（程度），係有好大距離，中間冇乜path可以跟住……我而家條路都只係由自己創出嚟。」由於現實環境差異，相比起外國追夢式的棟篤笑事業，本地的棟篤笑表演者難免要兼顧更多受眾與商業面向的考慮，限制亦相對較多；但隨著港人在各大串流平台和社交媒體中，比從前更頻繁地接觸到國外的棟篤笑節目，相信將會有更多本地觀眾，會主動探索Open Mic和棟篤笑演出箇中的魅力所在。
Low energy式演出
訪問拍攝期間，Jordan總流露著幾分靦腆，在認真回應提問之間，又往往保持其獨特幽默節奏，令現場每人也不禁掩口而笑。大家若是看過Jordan的演出或其社交平台影片，相信不難理解他的「low energy」演出風格，問到到底這種風格是自然而成，還是刻意營造，Jordan交出這樣一個真誠回答：「我本身都係噉（low energy）。頭一兩年見到其他表演者會好高energy去撩觀眾，我都有嘗試過幾次，但覺得唔natural、唔係我自己。之後見到Norm Macdonald呢位comedian，佢都係出名頹頹哋好hea，先知原來有啲人都可以噉，咁我就做返自己。」
縱然Jordan自兒時便喜歡「整蠱」和說笑逗樂同學，但他自認個性不算外向。日常若是觀察到任何有趣事物，或是冒起新鮮想法，比起直接與別人溝通，他更傾向先自行思考，再認真度橋，把所見所想化為一個又一個笑話，以棟篤笑或短片的方式與觀眾分享：「有時你就噉講出嚟，啲人會冇咁留意，但如果你整到一條好笑嘅片，噉就有娛樂性又可以表達到諗法。」
說笑轉化悲傷
作為一名平凡人，往往不能事事稱心如意，間中總有無力控制的事佔據心頭；作為一名表演者，Jordan則習慣把傷痛化成笑話，以幽默轉化萬千思緒：「我覺得幽默係其中一種方法去process事情，我個人如果有唔開心嘅事發生，會諗吓點樣可以轉化成笑話拎上台講，講完就會舒服啲。例如如果我好想做一件事但俾人拒絕，噉我會搵個好笑嘅位，笑咗佢算。」於是說笑對他而言，既是事業，亦是情緒轉換機制。
常言在香港從事表演行業不是容易事，大眾普遍要求高且難以取悅。相比起在意負面批評，Jordan反倒更重視在表演中遇到知音：「我係講自己point of view，總會有人接受有人反對，但at least我講咗出嚟，起碼大家可以知道原來有人係噉諗，都已經係make a difference……因為好多時有人有其他睇法，但唔敢講或者冇platform講。」表演多年，偶爾也會遇上講完笑話冇人笑的尷尬時刻，他直言曾經對此相當在意；不過經過多次演出，逐漸調整心態，他慶幸現能得著一群理解且支持他的觀眾朋友，彼此能從笑聲中產生共振，一同感受棟篤笑的力量。
